انهاردة هنتكلم علي حاجة مهمة جدا جدا ، وهي الرؤية الشرعية ، يعني ايه الرؤية الشرعية وليه بتتعمل وايه اصولها ...
الرؤية الشرعية :
هي نظرة شرعية ربنا حللها للمسلم وهو رايح يتقدم للبنت اللي هيتجوزها .
ليه بتتعمل ؟
بتتعمل عشان كل طرف يعرف التاني علي حقيقته من غير كذب ونفاق وبالمظهر الحقيقي قبل الإتفاق علي الزواج .
ايه اصولها ؟
- لو أهل البنت شافوا الخاطب اللي جي غير مناسب يبقي ميحقش الرؤية ليه .
- زي ما فهمنا لازم موافقة أهل البنت .
- تكون في حضور والد او اخ للبنت ، وام او اخت الخاطب .
- يكون الكلام في حدود الأدب المتعارف عليه .
- الخاطب يحق له بحسب الإجماع انه يشوف وجه البنت وايديها وشعرها .
- البنت تكون من غير اي مستحضرات تجميل .
دلوقتي بقي نقول 10 نقط مهمين للخاطب تذاكرهم كويس وانت رايح وربنا يسهلك ...
1 . قبل ما تروح لازم تكون عرفت كل حاجة عن البنت والاسرة وراضي بيها ومش فاضلك غير الشكل .
عشان لو عجبتك وبعد كدة معجبكش البيت او الاسرة هتزعل جدا .
2 . لو عرفت تخلي والدتك او اختك تشوفها قبلك - لو ينفع - ويكونوا عارفين انت بتحب ايه ، عشان لو مش مناسبة ليك متحرجش بنات الناس الله يكرمك .
3. وانت رايح البس الحتة اللي عالحبل وحضر نفسك كويس وفكر هتتكلم في ايه عشان ساعة الجد مش هتلاقي حد وهتنسي كل اللي حضرته .
4 . البنت لما تدخل هتلاقيها مش بتبصلك تقريبا وغالبا مش بتكلمك او بترد بالعافية ، عادي والله هي كويسة وبتتكلم وبتهزر .. بس مش معقول تكون اول مرة تشوفك وتهزر معاك ، فمينفعش ترسم لها صوره ذهنية غلط بسبب اول لقاء .
5 . لو هي مكسوفة ماشي لو انت مكسوف مش ماشي طبعا ، حضرتك هتكون مكسوف وبعد ما تروح تقول مشفتهاش كويس وديه المرة الوحيدة اللي يجوز ليك تشوف واحدة مش من محارمك ، فركز الله يكرمك كدة عشان تختار صح لانك في الغالب هتتحرج تطلب تشوفها مرة تانية .
6 . ممكن تكلمها تلاقيها مش بترد او بترد وبتتلغبط .. عادي جدا ، ده دليل علي حيائها اختارها وانت متطمن بعد الجواز هتتكلم لحد ما تزهقك .
7 . انت رايح عشان تشوف شكلها ، لكن لو عايز تعرف طبعها واخلاقها .. يبقي تركز مع حماتك وتشوف تصرفاتها لانها مش هتكون مكسوفة زي خطيبتك وهتكون بتتعامل بطبيعتها ، فلو عجبك اخلاقها وطبعها توكل علي الله .. اصل ديه التطور الطبيعي لخطبيتك .
8 . ركز كويس في البيت ، هل هو بيت سعيد ؟ ، هل الاسرة متفاهمة ؟ ، هل البيت نضيف ؟ ، هل الاب هو فعلا راجل البيت وحماتك بتحترمه ؟ لان بيتك هيكون نسخة من اللي انت شايفه .
9 . لما تتجوز واحدة اعرف انك بتتجوز البيت كله فلازم تختار البيت مش البنت بس .
10 . صلِّ استخارة واتأكد ان والدتك راضية عن الجوازة عشان ربنا يكرمك .
كدة خلاصة الخلاصة ...
تعليقات
إرسال تعليق