أمك ثم أمك ثم أمك يابني ، اللي مش فاهم يعني ايه أمه ولا حاسس لازم يراجع نفسه ، لو قعدت لوحدك وفكرت في حاجات كتير ماما عملتها وبتعملها وهتعملها وانت مش فاهم ولا واخد بالك منها ، وتيجي حضرتك تعلي صوتك وتزعق وتتقمص وتعمل اللي ما بيتعمل طب اتعدل بقي كدة وفوق واقرا النقط اللي جاية ومش عايز منك حاجة غير اني هاخد فيك ثواب ...
1 . أمك عيطت بسببك كتير سواء تعبان او مخنوق او في مشكلة وانت مشفتهاش وكنت فاكر ان محدش حاسس بيك ، بس ده ربنا خلقك جواها وهي بتحس بيك يا جاهل .
2 . امك كان نفسها في الحتة اللي اديتهالك بس سابتها ليك وهي فرحانة ، متحس علي دمك .
3 . امك عارفة انك بتحب حبيبتك اكتر منها .. ولسة بتحبك برضه اكتر من حبيبتك ، هنقول ايه مانت عبيط .
4 . امك راقبتك كتير وبصت عليك وانت نايم .. حقيقة مش مشهد في فيلم ، اصل البعيد شوال .
5 . امك قلبها اتكسر بجد وانت بتعيط وموجوع .. بس ضحكت معاك عشان تفك وتضحك ، انت لسة جبلة .
6 . امك اتخبطت واتلسعت واتعورت كتير وهي بتطبخ لك بس مابينتش لك عشان همها ان الاكل يعجبك وتبقي مبسوط ، الهط الهط .
7 . نسبة 90% من احترام واعجاب اهلك وقرايبك ليك بسبب كلام ومدح ماما فيك من وراك قدامهم ، هيص يا ابو CV هيص .
8 . امك بتحبك اكتر من اي حد في الدنيا يمكن اكتر من ابوك ، اصحي يا لوح .
9 . امك عندها استعداد تعمل فوق اللي فات ده مليون مرة وتخبيه عنك ، مهي مش مستنية منك شكر .
10 . اظن كدة انت فهمت ان امك مش مستنية مقابل لاي حاجة ولا عايزة تمسك مايك وتقول شوفوا يا ناس انا بعمل ايه .. اصلها بتحبك عشان بتحبك مش عشان مستنية منك حاجة .
امك هي معني كل حاجة حلوة في حياتك ، امك هي صفحة الامل المضئ في دنيتك ، امك هي سبب دخولك الجنة في اخرتك ، امك هي حاجات كتير اوي مفيش سطور توصفها ولا تفهمك ...
تعليقات
إرسال تعليق