قواعد الشغل العشرين

كتير مننا عجلة الحياة بتاخده والدنيا بتلهيه...

وبيبقي رايح جي كل يوم شغله من غير ما يفكر ولا يحسبها ، الكام نقطة دول قواعد اتعلمتها من خلال تجاربي المحدودة مع اكتر من وظيفة بأشكال مختلفة يارب تجربتي يكون فيها إفادة ، ومستني لو حد عنده تعليق أو إضافة ميبخلش علينا بيها .

1 - اوعي تشتغل يوم اجازتك .
2 - اعمل حاجة انت بتحبها او مارس هواية باستمرار جنب الشغل .
3 - حاول تتجنب الOver time علي قد ما تقدر واكتفي بساعات العمل العادية .
4 - افصل مشاكلك الشخصية عن شغلك ومتسمحش انها تأثر علي شغلك او عليك .
5 - دايما خليك طموح ومتخليش لخيالك حدود .
6 - طور نفسك باستمرار واتعلم مهارات وحاجات جديدة  .
7 - متديش لحد كلمة او وعد انت مش هتعرف توفي بيه .
8 - لو مبتتعلمش اي حاجة جديدة في شغلك امشي  .
9 - متخليش الشغل هو اكبر همك افتكر دايما انه وسيلة لتحقيق الدخل  .
10 - ميولك السياسي وفكرك لو فصلتهم عن بيئة العمل هتعيش مستريح  .
11 - متكرهش نجاح حد من زمايلك .
12 - في الشغل عامل ربنا متعاملش الناس .
13 - متتكلمش عن الشغل برة الشغل .
14 - متخليش حد يعدي حدوده معاك أيا كان  .
15 - متستعجلش النجاح كل حاجة بتاخد وقت ، اصبر !
16 - متجريش ورا الفلوس في حاجات تانية مهمة زي الخبرة اللي بتكتسبها ، والبيئة اللي انت شغال فيها .
17 - حاول تكسب الناس اللي معاك في الشغل وتسيب ليهم انطباع كويس .
18 - متتكلمش علي حد في ضهره ، زي ما الكلام بيوصلك اكيد هيوصل لغيرك .
19 - شكلك ولبسك واهتمامك بنفسك مهم جدا ، الناس بتحكم علي اللي قدامها اول حاجة من شكله .
20 - متنساش النقطة رقم 12 من غيرها كل الباقي ملوش لازمة .