ازاي تكسب قلبها ؟؟ - ?? How to win her heart

  ازاي تكسب قلبها ، جملة مش سهلة والموضوع مش بسيط .. انت يا لسة بتتعرف يا خطبت يا اتجوزت ، معلومة مهمة العاطفة عند الراجل اكتساب لكن عند المرأة فهي غريزة زي الأمومة بالضبط .. فعلاً الموضوع مش لعبة ومش بعطيك تريكات ولا انا جي ابيع لك دليل تثبيت الانثي في ثلاث جُمّل ، مبدئياً الكلمتين تاخدهم وتحطهم حلقة في ودنك .. عشان تعمل أي فعل من اللي هقولهم لازم تكون حاسس بكل حرف من كل كلمة ، افهم وحس ثم نفذ .

كل الكلام ده هيفشل تماماً لو غير محسوس بين أي اتنين مخطوبين ، متجوزين ..إلخ ، السطور اللي جايا اللي كاتبها مش كفتجي ديه مبنية علي دراسات نفسية وسيكلوجية ، وبعدين تم مقارنتها بالواقع والتأكد من ثبوتها واقعياً .

* عشان تشوفها دايماً مبسوطة حسسها بالإهتمام واديها من التشجيع اللي يكون حافز ليها عشان تحقق حلمها والأهم خليك مُقدر وجودها جنبك ودعمها ليك...

* قول لها : بمجرد ما قابلتك ، مبقاش حد يستحق أفكر فيه غيرك...

* ممكن متبقاش دايماً بطل في نظرها ، بس تقدر تكون دايماً جنتل مان بالنسبة لها...

* عارف.. !!  اعزمها علي ايس كريم ، البنت بتفرح جدا بالحاجات البسيطة ديه.

* خليك عارف انه مش مهم عندها انها تكون الأولي في حياتك المهم تكون الأخيرة .

* عاملها بإحترام وحب ، اديها المساحة اللي تختارك فيها تكون شريك حياتها ، تأكد ان مكانك هيكون في أحضانها...

* لو هي اختارتك وبقت عايزاك ، ميفرقش معاك مين عايزها غيرك لأنها خلاص اختارتك .. تأكد ان ده شئ غريزي بتتولد الأنثي به...

* اوعي أبداً تفوت فرصة تقولها فيها  " انتي حلوة اوي انهاردة " ، " اد ايه انتي جميلة " ، " كل مرة بشوفك أحلي من اللي قبلها " ومتبقاش مبتذل ...

* قول لها " بحبك يا هبلة " ، بس كدة...

* لو يا أخي انت معرفتش تبقي شاعر لها ، خليك القصيدة الخاصة بها وحسسها بتفاصيلها...

* من وقت لآخر أظهر لها إنها الأنثي الوحيدة علي الأرض...

* بص يا عم المتجوز .. الحضن مش بإيديك ، الحضن بمشاعرك وقلبك واحتوائك ليها .. خليك فاكر رجولتك هي البرواز اللي بيخليها تعيش انوثتها...

* عاملها دايماً زي ما كنت بتعاملها عشان تكسب قلبها ، كدة تضمن ان الرومانسية عاشت بينكم للأبد...

* قول لها انا محتاجك عشان بحبك .. هتلاقيها طفلة طايرة من الفرح حرفياً...

* لما تختار .. اختار اللي تشقلبلك حياتك مش بس تغير الحالة الإجتماعية بتاعتك...

* لما تحكيلك اسمع كلامها مرتين ، مرة للكلام نفسه .. ومرة لما وراء الكلام...

* كلمها في نص الليل قبل ما تنام ، قول لها جملة واحدة .. بحبك ، وكان نفسي اسمع صوتك قبل ما انام ، واقفل .. هتفضل تحلم بيك ايام وايام بسبب الجملة ديه...

* الولد بيخلي حبيبته تغير من البنات التانية .. انما الراجل يخلي البنات التانية تغير من حبيبته...

* افهم الجملة ديه قبل ما تقولها ، قولها اتعلمت اني اكتفي بيكس بس مش بعرف اكتفي منك ...

* دلعها عاكسها ، امدحها بحاجة فيها...

* شجعها حفزها ، زقها لقدام ، عرفها ان قوتها من قوتك...

* عرفها ان نجاحها بيحفزك تنجح اكتر .. فهمها انها مش تابع ليك واكسر القاعدة انها مجرد علي جنب بتزقك...

* هاتلها وردة بدون اي مناسبة ، بدون عيد ، بدون سبب .. قولها : شفت الوردة فافتكرتك وحبيت اجيبهالك ، لأنك أجمل وردة في حياتي...

* عارف لما تقويها .. هتدعمك ، هتساندك ، هتؤمن بيك ، هتكون حضنك وقت ما تتعب...

* الأحسن في انك تخسر جدال ، ولا تخسر علاقة كاملة بتحبوا بعض فيها... 

* عارف لو حبتك بجد ، هتعيط أكتر لما تحاول تهديها .. هي هترتاح انها تظهر مشاعرها معاك...

* هاتلها هدية ومعاها ورد وسيب مع الورد كلمة واحدة بس " بعشقك " ...

* متغيرش بزيادة ، خليك غيور في الحدود الصحية...

* متحاسبهاش علي حاجة انت شايفها غلط إلا لما تتكلموا .. صدقني ممكن تكون مش فاهمة...

* كن لها زوج وأب وأخ وحبيب ، ميضرش كمان انك تبقي أم وأخت وأي حاجة ممكن تتخيلها...

* عودها علي المناقشة والإفصاح ، متخليهاش تبقي خايفة من ردة فعلك .. عشان تبقي العلاقة صحية...

* حاول تفهم شخصيتها ، يعني العنيدة ديه طيبة جداً كن معاها عنيد ليها مش عليها ، مرهفة الإحساس ديه محتاجة حد يحتضنها ، الإنطوائية اعرف مفتاحها وطمنها وخليها تكتشف العالم ، الجريئة طوع الجرأة بتاعتها بحيث انها متضرش نفسها ولا تضرك - مش طالبة غباء - ، الطموحة ديه خليك معاها هتبقي سبب نجاحك...

* كن مبدع ، حاول تعلمها حاجة جديدة كل يوم ، اخرجوا من غير ترتيب ، روح اي مدن مصايف في الشتاء .. إلخ...

* اخيراً .. متسمحش للبنت ان هي اللي تقود العلاقة ، هي هتحاول تتحكم في بعض أبعاد العلاقة العاطفية أو العلاقة بينكو ، اوعي تسمح بكده ابداً .. لأن المرأة بتستمتع انها تكون تحت قيادة رجل حقيقي ، لو ضغطت عليك وبدأت تحط أبعاد العلاقة ، سيبها أحسن عشان هتبقي طرطور برخصة...