علامات تعرفك انك مش مستعد للجواز ...

شوف بقي .. !!
الجواز طلع محتاج مهارات زيه زي أي حاجة تانية ويمكن المهارات هنا أهم لأنها هتفرق في كل نتيجة بعدين ، الجواز صعوبته في سهولته وحلاوته في الشدة اللي بتعدوا بيها ، الجواز بيت بيتحول بدون مقدمات من مجرد شوية طوب وحيطة لقصر مهما كان حجمه او مكانه بس بيبقي فيه روح حبكم وحرارة عشقكم .

هنا شوية علامات لو لقيتهم في نفسك يبقي انت لسة مش مستعد للجواز ، يلا بسرعة ظبط نفسك واستعد لنصك التاني .

1 . لو مفيش عندك خطة مالية للمستقبل ومش عارف هتعمل ايه ازاي وبكام امتي وفين ، كدة انت بتغامر بنفسك وبشريكتك .

2 .  لو متخيل انك مش هتعمل حاجة في الشقة ، او فاكر ان عمرك ما هتطبخ لنفسك او ليها تبقي في الوهم ، اهي ديه مهارة بقاء مش مهارة حياتية عادية .

3 . لو فاكر ان الجواز مفيهوش خناق تبقي مش طبيعي وديه مش هتكون علاقة صحية ، لكن الصحي ان يبقي خناق .. بس الاهم هتحلوها ازاي .

4 . لو لسة مش عارف تفرق بين الزوجة أو شريكة الحياة والحبيبة أو العلاقات الطياري .

5 . لو بتتأثر بكلام صحابك وأهلك وقرايبك وبتديهم مساحة انهم ياخدوا قرارات عاطفية بالنيابة عنك .

6 . لو مبتعرفش تسمع من قلبك ، ديه مهارة مهمة جدا في الارتباط او العلاقات العاطفية ، زي ما قلنا قبل كدة في مقال  " ازاي تكسب قلبها " انك بتسمع مرتين مرة للكلام ومرة لما وراء الكلام  .

7 . لو حاسس انك حبيتها من أول نظرة وخدت قرار الجواز من غير ما تتعرف عليها ، كدة اعجابك وانجذابك ليها جسدي بس ، والجواز في حاجات تانية غير الجسم  .

8 . لو مش فاهم ان الاختلافات المادية او الاجتماعية محتاجة منك عقل ودماغ ناضجة ومرونة منكم انتم الاتنين .

9 . لو مبتعرفش تعبر عن مشاعرك بالكلام حتي لو جواك في كعبلة ، ديه مهارة عاطفية مهمة جدا  .

10 .  لو متخيل ان الجواز هدف وغاية وبعد ما توصله تتخلي عن كل طموحاتك ولو متجوزتش بنت بنفس منطقك ده ، يبقي هتعاني وتخليها تعاني وتكرها نفسها  .

11 . لو معندكش مرونة كفاية انك تتفهم احتياجاتها العاطفية وتشبعها حتي لو مفيش اي منطق فيها بالنسبالك   .

كدة سهلة وواضحة والدنيا جميلة  😂😊😁