سر اللعنة ج2

طبعا صحيت من النوم وانا هموت واعرف خميس ده هيقولي ايه الساعة لسة 11 الصبح طب انا ورايا حاجات عايز اخلصها بس دماغي مش سايباني في حالي انا البس وانزل وربنا يسهل على المغرب بقى .. ايه ده !! الساعة بقت 3 خلاص هانت شوية واروح وبعدين انزل القهوة ، وكنت في القهوة عالساعة 5 المغرب بالظبط ، رزة ! اؤمر افخم هاتلي قهوة مانو ، حبيبي افخم ومعاااك واحدة مانو مدلعة لاحلى بشمهندس . خميس داخل القهوة وانا فرحان بعبط اكني مستني ابويا اللي راجع من السفر تعالى اعم خميس يا حلو ها عملت ايه ، حجر القص بتاع خميس يا رزة ، بس كدة واحدة معسلة تحت الشباك وظبط نارك ، عامل ايه يا هندسة ؟ والله الحمدلله يا خميس بس من الصبح وانا مستني اعرف عملت ايه ، والله يا هندسة لأجل الحظ انهاردة الراجل اللي في الخامس كان جايب شيل وحاجات كتير وهو نازل من التاكسي قالي تعالى يا خميس شيل معايا وطلع الحاجة ، شيلت معاه كرتونة كبيرة كدة بتاع فرن بشواية فراخ وفي تايمر وتظبط فوق وتحت او كل اتجاه لوحده ، يا خميس بالله عليك بطل هري شواية فراخ ايه اللي بتتكلم عليها ركز في المهم كنت طالع معاه بالكرتونة ها وبعدين ، اه اه فاكر كرتونة الفرن ديه وانا طالع معاه اتكعبلت في السلم وكنت هتكفي على وشي اصل في سلمة بين الرابع والخامس مكسورة بقالها بتاع 3 سنين زيها زي كام سلمة بطول السلم وكل ما نكلم عشان يلموا ويصلحوها محدش بيرد ، يا خميس بالله عليك ركز سيبك من السلم ، حاضر انت مستعجل ليه بس المهم بعد ما اتكعبلت في السلم ووقعت الكرتونة معملتش صوت فانا استغربت ازاي الفرن مطلعش صوت بعد الوقعة ديه فانت عارف انا متفوتنيش الفوتة يعني روحت فاتح الكرتونة بسرعة قبل ما يطلع ولقيت فيها استغفر الله استغفر الله ملابس داخلية حريمي ، طب ما عادي ياعم مش ممكن يكون شغال فيهم مثلا ، يا هندسة لا الحاجة مكنتش نضيفة تحسها حد كان لابسها ، غريبة ديه .. يا خميس !! ، ايوا جي يا استاذ عزت ، انت قاعدلي عالقهوة وسايب الماية مغرقة العمارة روح شوف في ايه ، حاضر سلام انت دلوقتي يا هندسة بكرا هكملك ، تمام اعم خميس ...

يتبع...

 الجزء الأول